Louise Hegelund pillugu eqqartuussineq aqagu ingerlanneqassaaq
Maannakkut angut 21-inik ukioqartoq, unnerluutigineqarpoq kingorna toqutsisimasutut eqqartuusaalluni killeqanngitsumik Herstedvesterimut inissinneqartussanngortitaagaluarpoq. Kisiannili aalajangerneq maalaarutigineqarmat Nunatta eqqartuussiviani aqagu ingerlanneqartussanngorpoq.
- Suliami uani pineqarpoq arnaq inusuttoq Sisimiuni 2007-imi toqutaasoq. Piffissami sivisulaartumi misissuisoqareernerata kingorna angut tigusarineqarpoq toqutsisimasutullu unnerluutigineqarluni tigummigallagassanngortinneqarluni. Angut taanna septemberimi 2008-imi toqutisimasutut, pinngitsaaliisimasutullu illumilu eqqissiviilliortitsisimasutut eqqartuunneqarpoq, kingorna maalaarutigineqartumik. Maannalu maalaarut Nunatta eqqartuussiviata aqagu aallarnissagaa vicepolitimesteri Morten Nielsen oqarpoq.
Suliami illersuisoq maannamut oqaaseqarsinnaanngikkallarpoq, aatsaallu suliaq naammassinerani oqaaseqarsinnaassalluni. Unnerluussisulli killeqanngitsumik inissiinissamut aaliangiussaq attatiinnarniarpaa.