Louise Fontainip kinaassutsini ujarpaa

Louise Fontain Sisimiuni inunngortuuvoq, qulingiluanilli ukioqarluni Danmarkiliartitaavoq. 49-nik ullumikkut ukioqarpoq, Københavnimilu Illu Atlantikumi assinik saqqummersitsinermini maanna saqqumilaarluni. Saqqummersitsineq ateqarpoq ”Inussuit”, tassa ”Varder”.

Louise Fontain oqaluttuarpoq nunami allamiilluni kinaassutsip nassaariniarnera saqqummersitsinermini ersersinniarini:

- Meeraatilluni angerlarsimaffimmiit Danmarkimi kulturimut allarluinnarmut aallartitaanermut tunngassuteqarpoq, tassa uanga qulingiluanik ukioqarlunga taanna misigaara. Suliaq sakkortoorujussuusimavoq, oqimaatsoq, misigissuserpassuillu suliamiipput, tassami meqqanik Danmarkimut 1960-ikkuni misiliumik atuariartortitaasarneq oqaluusrineqartarsimanngilaq. Louise Fontain oqaluttuarpoq.

Louise Fontain maanna ueqarpoq meeraqarlunilu, Norgemilu pilluarlutik inuupput.

- 25-t missaannik ukioqarlunga aalajangertariaqarsimavunga: taama inuuneqarnera akueriinnassavara imaluunniit qanoq? Tassa taamanili allaaserisalerpara: Suuvunga, kinaavungalu? Taamaalioreerama paasiniarsarilerpara, kinaassusera qanoq ilillunga nassaarissanerlugu, nunami allami najugaqarpunga, danskiunnginnera takuneqartuaannarsinnaavoq, naak danskisut oqaaseqaraluarlunga. Kalaaliunera takuneqartuaannarpoq, naak oqalunngikkaluarlunga.

Louise Fontain aperaarput kalaaliararpassuarnut 1960-ikkunni qulingiluanik/qulinik ukioqarlutik Danmarkimukartitaasimasunut arlaannik siunnersuutissaqarnersoq, akivorlu:

- Ingerlariaqqinnissannut najoqqutassanik ujaasisimavunga, tassa taakku inussunnik uanga taagorpakka. Qanoq pisoqarsimanera paaserusullugu toqqorsivissuaq, Rigsarkiv, ornissimavara. Inunnillu arlalinnik nassuiaasinnaasunik takkuttoqariataarpoq. Imaanngilarmi oqaluttuaq ilinnut tunngasoq illit nammineq naammagalugu atussagit, taamanikkulli misiliummik atuariartortitsisarsimanermut inuiaqatigiit aamma akisussaassuseqarput. Inuiaqatigiillu allanngortinneqarsinnaangillat, kinaassuseq ilisimanngikkaanni, Louise Fontain naggasiivoq.