Lotto-rnersuaqarpoq
Pingasunngornernut naliginnaasunut allanut naleqqiullugu ullumi pingasunngornermi lottornermi aningaasat kaaviiaartitat tallimariaammik amerleriarsimapput. Taama nalunaaruteqarput Danske Spil.
Taamaattoqarneranut pissutaasoq ataasiinnaavoq, tassalu lottomi eqqugassat sapaatiit akunnerini kingullerni arlalinni amerligaluttuinnarsimanerat.
- Onsdags Lottomi eqqugassat 146 million koruuniusut tusarsimallugit inuit lottorneq ajortut kuponimit ataatsimik marlunnilluunniit pisiniartarput, pisiniarfimmi Nuummiittumi Nathalie-mi pisiniartitsisoq, Henrik Winum taama oqarpoq.
- Lottomi eqqugassat sapaatit akunnerini kingullerni arlalinni amerliartortillugit isertitagut marloriaatinngorput. Oqarsinnaanngilanga ullormiit ullormut isertitagut amerleriapiloortut arriitsumilli tamanna pivoq, Henrik Winum oqarpoq.
Pisiniat ilaat, million koruunerparsuarnik eqquinissamik neriuuteqartoq, Niels Peter Lukassen naammattoorparput.
- Soorunami neriuppunga eqquissallunga, immaqaasiit minnerpaamik eqquissaanga. Kisianni soorunami eqqugassaq anneq eqqussallugu neriuppunga, Niels Peter Lukassen oqarpoq.