Los Angelesimi OL-eqarnissaa 46 milliardeqassangatinneqartoq
6,9 milliardit dollarit imaluunniit 46 milliardit koruunit missiliorlugit.
Los Angelesimi 2028-mi OL-eqarnerata aaqqissuunneqarnera aaqqissuisussat naapertorlugit taama akeqassaaq.
Ukiut qulingiluat qaangiuppata aasaanerani unammiuaarnerit aaqqissuunneqarnissaannut aningaasaqarnikkut pilersaarut sukumiisoq Amerikami aaqqissuisussat marlunngornermi saqqummiuppaat.
Pilersaarummilu atuarneqarsinnaavoq aaqqissuussinissaq aaqqissuisussat aasaanerani unammiuaartitsinissamut 2017-imi neqeroorutigisaannit akisunerussasoq. 2017-imi neqeroorutigineqartoq 5,3 milliardit dollarinut missiliorneqarpoq.
Aaqqissuussinermut aningaasartuutissat dollarip 2016-imi nalinga najoqqutaralugu taamani naatsorsorneqarpoq. Aningaasartuutissallu piviusorsiortumik taggikkumallugit ukiuni tullerni qulini akit allanngorarnissaat naatsorsuinermi nutaami sillimaffigineqarpoq.
Aaqqissuisuni LA 2028-mi siulittaasoq Casey Wasserman taama oqarpoq.
- OL-imik iluatsitsiffiulluartumik qanoq aaqqiissuussisoqarsinnaanera takutikkusupparput, unammiuaarnerillu inuiaqatigiit tulluusimaarutigisinnaasaannik nuannerluinnartumik pinissaat pilersaarusiussallugu qilanaarivarput, siulittaasoq oqarpoq.
Los Angeles OL-imik aaqqissuisussatut 2017-imi toqqarneqarpoq. Amerikamiut 2024-mi OL-ertoqarnissaanut aaqqissiusussatut Parisimut aallaqqaammut unammilleraluarpoq.
Soqutiginnittulli ikilinerat pissutigalugu Nunat tamalaat OL pillugu ataatsimiititaliaat (IOC) aalajangerpoq aasaanerani unammiuaarnerit Parisimi Los Angelesimilu aaqqissuunneqassasut.
Paris 2024-mi aaqqissuissuussaaq, ukiullu sisamat qaangiunnerini Californiami OL-ertoqassalluni.
Los Angeles nunat tamalaat unammiuaarnerinik pingajussaanik aaqqissuisuussaaq. 1932-mi 1984-imilu unammiuaarnernik aaqqissuisuuvoq.
/ritzau/AFP