Londonimi qaartartoq qaartussaajunnaartinneqarpoq

Allattoq Najaaraq Egede
juunip 29-at 2007 04:44

Londonip qeqqani qaartartumeeriarnerugaluaq unnuaq pinngitsoortinneqarpoq, biilimi qaartartoq qaartartunik ilisimasalinnit qaarsinnaajunnaartinneqarmat.

Biilit qaartussianngorlugit aqqusinermut, angallaffiulluartartumut, isiginnaartitsisarfiit aqqusernatut ilisimaneqartumut, The Haymarket-imut inissinneqarsimapput.

Politiillu oqaatigaat, qaartussanngortitaagunavissoq qaartussaajunnaartinneqareermat, maanna peqqarniisaarnianik akiuiniat misissueqqissaalersut.

Tuluit Nunaanni innuttaasut ilaat politiinut tappavani unnuaq marlunngorluinnartoq sianersimavoq biilit eqqumiiginartut sumiinneri taallugit.

Aqqusineq angallaffigeqqusaajunnaarlugu matuneqarpoq, qaartartunillu ilisimasallit misissuilerlutik. Sulilu aqqusineq matoqqatinneqarallassasoq politiit nutaarsiassaqartitsivinnut nalunaarutigaat.

Nunap iluagut qimuttuitsut aqqutaat Piccadilly Circus, biilimik nassaarfiup eqqannguaniippoq, isaarissalli ilai matullugit ammatiinnarneqarluni.

Londonimi juulip ulluisa arfineq-aappaanni 2005-imi qaartartumeerineqarmat inuit 52-it ajunaarput.