Londonimi misissuineq unitsinneqarpoq
Peqqarniisaartartut akiorniarlugit suliniarneq Tuluit Nunaanni sakkukilliallanneqarpoq massakkorpiarlu sooq Londonimi misissuineq unitsinneqarsimanersoq apeqquserneqarpoq.
Pakistanimi atuakkiortoq tusagassiortorlu tusaamasaq, Ahmed Razid DR-imut ima oqarpoq.
- Tigusarinnittaqattaarnissat USA-mit naalakkiutigineqarsimanissaa ilimagaara, Pakistanimi atuakkiortoq tusagassiortorlu tusaamasaq Ahmed Razid oqarpoq. Nangillunilu:
- Peqqarniisaarniarlutik pilersaarusiortut Londonimi malunnaarsaarfigalugit malinnaaffigineqarneri sivisunerusumik tulunnit kissaatigineqaraluartoq, USA-mit taamatut piumasaqartoqarsimanissaa ilimagilluinnarpara. USA-mi præsidentissamik qinersinissaq qaammatit pingasut qaangiuppata qiterpaassaaq taamaattumik massakkut USA-mi præsidentiusup Buship imminik taasisussat amerlaneruniassammata taamatut piumasaqarsimassaaq. Massakkummummi USA Afghanistanimi, Irakimi kiisalu Libanonimi angusaqarpallaarnikuunngilaq. Nunani assigiinngitsuni akersuunnerit imminnut attuumassuteqanngilluinnaraluartut, qineqqusaarnermi sakkussamisut atussagai aamma ilimagaara. Tuluit Nunaanni politiit iliuuseqarsimanerat aamma naalakkersuinermik suliaqartunit tanngassimaartitsilaavippoq. Washingtonimi Londonimilu ajugaasimaarnerit malunnarput, Pakistanimiit Ahmed Razid oqarpoq.
