Londonimi biilertunut 90 kr.-neeqqaartarput
Maanna Londoniliassaagut tassani tuluit illoqarfiisa pingaarnersaanni biilertunut akileraarut assortuussutaaqisoq tusariartigu. Taanna biilertunit nuannarineqanngeqaaq, maannalu illoqarfiup ilaani atuuffia annerulersinniarneqarpoq. Londonimi illoqarfiup aqutsisuisa illoqarfiup ilaani biilertut aatsaat 90 koruuneeqqaarlutik biilersinnaaffiat annerulersippaat. Tamatumani angallannerup ingerlalluarnerulernissaa siunertaavoq.
Illoqarfissuaq biilerpassualik, angallanniapiloorneq. Tamannali Londonip iliuuseqarfigaa. 90 koruuninik akileeqqaarluni aatsaat biilerfiusinnaasoq ullaaq annerulersinneqarpoq, ilaatigut illoqarfiup immikkoortua pisuunit najugarineqartoq ilanngunneqarluni.
Aaqqissuussineq iluatsilluartoq maanna kimmut annerulersinneqartoq borgmesterip Ken Livingstonep oqaatigaa. Taassuma 2003-mi biilertunut akileraarut illoqarfiup qiterpasinnerusortaani atuutsilersippaa. Tamanna angallannermut iluaqutaavoq. Biilertunut akileraarut eqqunneqanngikkallarmat bilit pisuinnartutut sukkassuseqarlutik ingerlaartarput.
Maanna biilertunut akileraarfiusartumi bilit ullormut 70.000-inik ikileriarsimapput, taamaalilluni tamaani biilertut agguaqatigiissillugu tiimimut 15 kilometerinik sukkassuseqarlutik ingerlaarsinnaalerlutik. Assiliivippassuit biilertunik nakkutilliissutit ullut tamaasa biilertut assilisarpaat, biilerniaraannilu ulloq taanna akiliisariaqarpoq, akiliinngitsooraannilu pillaammik akiligassiisoqartarpoq. Qanorlu akiliinissamut periarfissarpassuaqarpoq; oqarasuaatikkut, sms-ikkut, internetikkut, allakkerisarfikkut imaluunniit kioskini.
Sapaatip akunnerata naanerani akileeqqaarluni biilerfiusinnaasup annerulersinniarneqarnera akerliuffigalugu biilerpassuit kigaatsunnguamik ingerlaarrapput, borgmesterilli Livingstonep akerliusunut oqalliseqateqarnissaminut tunuarsimaanngitsup oqaatigaa, biilertunut akileraarut aningaasarsiornikkut iluatsitsiffiusoq, aningaasallu angallannermut iluaqutaanerarlugit, mingutsitsinermut minnerulersitsinerarlugu, aqqusinermi ajutoortut ikinnerulerlutik cykilertullu amerlanerulerlutik kiisalu amerlanerit angallassissutinut pisortanit ingerlanneqartunut ilaasalerlutik.
Immaqa Nuummi biilernermut akileraaruteqalersuuppat angallatileruttornerup nalaani bussit sukkanerusumik ingerlasalissagaluarput?
