Londonimi, Berlinimi Frankfurtimilu akerliussutsimik takutitsisorpassuaqarpoq

Nunat suliffissuaqarfiusut, G-20-nik taaneqartartut, Tuluit Nunaanni illoqarfiit pingaarnersaanni, Londonimi, sapaatip akunnerata tulliani ataatsimiinnissaannut akerliullutik inuit tusindtilippassuit Londonimi, Berlinimi Frankfurtimilu akerliussutsimik takutitsipput.
marsip 31-at 2009 17:03

Nunani aningaasarsiornikkut nukittunersani naalagaaffinni ittut naalakkersuisullu siulittaasui Londonimi sisamanngorpat ataatsimiissapput, nunarsuaq tamakkerlugu aningaasarsiornikkut ajornartorsiorneq qanoq ilillugu akiorniarneqarsinnaanersoq ataatsimoorlutik oqaluuserissallugu, isummaminnillu saqqummiisut G-20-mi pisortat allagartarsuarni nassataminni ullumi eqqaasippaat, nunani aningaasarsiornikkut ajornartorsiornermi eqqugaasuni innuttaasut puigussanngikkaat.

Londonimi oqartussaasut ernummatigaat akerliussutsimik takutitsisut peqqarniisaarlutillu aserorterissasut, taamaammat politeerpassuit nakkutilliisinneqarput.

Londonimi peqatigiiffiit, kattuffiit, eqqissinermik anguniagallit avatangiisillu pillugit suliniaqatigiiffiit 150-init amerlanerit akerliussutsimik takutitseqataapput, aaqqissuisullu erseqqissaatigaat, akerliussutsimik takutitsineq tamarmi eqqissisimasumik ingerlanneqassasoq.

Tuluit Nunaanni politiit oqareerput, sapaatip-akunnerata ingerlanerani pisussarpassuit politiit oqaluttuarisaaneranni aatsaat taama annertutigimmata.

Barack Obama USA-mi præsidentinngoramili pernaammik Europamut angalavoq, Londonimullu uagut nalunaaqutarput naapertorlugu nalunaaqutaq tallimanut tikippoq. G-20-p ataatsimiinnerani najuunnermi saniatigut Nunat Killiit Illersoqatigiiffiata, NATO-p, ukiunik 60-inngortorsiorluni Tysklandimi sapaatip-akunnerata uuma ingerlanerani ataatsimiinnissaani Barack Obama aamma najuutissaaq.