London Miningip oqallissaanerani Tibet ilannguppaat
Paragraf 37 naapertorlugu apeqquteqartuuvoq, Inuit Ataqatigiinneersoq, Naaja Nathanielsen. Taassuma paaserusuppaa, nunanut allanut politikkikkut Naalakkersuisut isumaliutersorneranni iliuuseqarnerannilu Kina-p naliginnaasumik inuit pisinnaatitaaffii pillugit iliuuseqarnera, pingaartumik Kina-p Tibet-imut attaveqarnera Naalakkersuisunit qanoq nalilersorneqarsimanersoq.
Naaja Nathanielsenip tunngavilersuuteqarnermini tikkuartorpaa, Kinap aningaasarsiornikkut siuariartupiloornerani nunarsuarmilu kineserit aningaasaataat sumiiffinni amerlaqisuni pilersaarusiorluakkamik aningaasaliissutigineqartarneri. Kiisalu Kinap inuit pisinnaatitaaffiinik innarliisarnera, soorlu tamanna ilaatigut Tibet-imik 1950-imi Kinap tiguaanerata kingorna pisoq tunngavilersuutigalugu.
- Kinap Kalaallit Nunaanut soqutigisai annertusiartortillugit, Kinap inuit pisinnaatitaaffii pillugit innarliisarnerat qanoq iliornikkut Nunatsinni Naalakkersuisutsinnit avoqqaarineqarsinnaappat? Naaja Nathanielsen apeqqummini allappoq.