London Mining Namminersorlutik Oqartussanit akissarsitinneqartoq

London Mining Greenlandip akissarsitinneqarneranut pissutitaatinneqarpoq, suliffeqarfissuaq Nuup Kangerluata qinnguani Isukasiani, ukiuni tulliuttuni 30-ni saviminissamik piiaasinnaaneranut akuersissummik, siorna oktobarip 24-anni pissarsinera.

Ingerlatseqatigiiffiup iluani suliassaqarfiit eqqarsaatigalugit sullissilluarsimanissaq imaluunniit inuup ataatsip sullissilluarsimanera, akissarsinissamik tunniussinermi tunngavigineqartussaapput. Taakkulu misissuinermik suliaqarnermi piumasaqaataasut, tassalu avatangiisinik isumalluarnartumik mianerinninneq aamma ingerlatseqatigiiffiup inuiaqatigiinnut akisussaassuseqarnera naammassisimassagaat.

London Miningimit pitsaasumik suleqateqarluarsimaneq, Aatsitassanut Naalakkersuisup, Jens Erik Kirkegaardip akissarsisitsinerminut atatillugu oqalugiarnermini eqqaavaa.

- Suliffeqarfissuaq annertoorujussuarmik pikkorissuseqarpoq aamma tamatigut aaqqiissutissarsinissaq siunnerfigalugu suliaqartarlutik, Jens Erik Kirkegaard oqarpoq.

Akissarsiaq, London Miningip Kina-mi ingerlataata pisortaanit, Jenny Yang-imit tiguneqarpoq. Taassumalu qujaniarnermini ilaatigut oqaatigaa, London Mining-ip pingaarnertut suliassaarigaa, inuiaqatigiinni piujuartussamik iluaqutaasumillu anguniagaqarnissaq, tamannalu ingrlanneqartoq kalaallit inuiaqatigiit suleqatiginerisigut.

Jenny Yangip aamma oqaatigaa, suliassap ingerlanneqarnissaanut aningaasalersuinermut tunngaviusussat katiterneqarnissaannut London Mining eqeersimaartumik suliaqarsimasoq.

Aatsitassat pillugit nuisitsineq, Torontomi maanna pisoq, nunarsuatsinni annerpaatut nunallu ataasiakkaat aatsitassat pillugit isumaqatigiittarneranni qitiulluartuusartutut oqaatigineqartarpoq.

Nuisitsinermi sammisat ilagaat, nunani tamalaani aningaasaqarnikkut ajornartoornerup malitsigisaanik ingerlanerliorsimaneq.