London Mining: Kalaallit Nunaannut akileraaruteqartarpugut
London Miningip tusagassiuutitigut paasissutissanik eqqunngitsunik saqqummiussisoqarsimaneranik taallugu maanna nalunaarummik nassiussaqarpoq, suliffeqarfik pillugu oqallisaasunik paasissutissanillu eqqunngitsunik naqqiissuteqarfiusumik.
London Mining LMG-mik 100%-imik piginnittuusoq, uppernarsaavoq, piginneqatigiilluni aaqqissuussisimanera LMG’mit Kalaallit Nunaannut akileraarutissanik akiligassanik annikillisitsinermik malitseqarnavianngimmat, taamaaliornikkullu Aatsitassarsiorneq pillugu Inatsit naqissuserneqarluni. Jersey’mi najugaqarfilerlugu piginneqatigiiffimmik atuineq inatsisit naapertorlugit februaarimi 2011-mi pilersinneqarpoq aaqqissueriaaserlu ilisimaneqarluarlunilu eqaatsumik pilersitsineruvoq, aningaasaaliisussanik suliniutitsinnut ineriartortitsinissamik periarfissiisoq, CEO Graham Hossie London Miningimeersoq oqaluttuarpoq.
London Mining Nuup Kangerluani piiavimmik suliniummik aallartitsingajalerpoq. Pilersaarutillu malillugit ingerlasoqassappat suliniut taanna allamiunik nunaqavissunillu suliffissaqartitsikkut qulakkeerisussaavoq. Aammattaaq suliniut pineqartoq Inatsisartuni suliniutit angisuut eqqartorneqarnerinut pissutaasut annerit ilagaat.
- Kalaallit Nunaanni inatsisilerinikkut aaqqissuussiisimaneq pitsaasumik pilersinneqarsimavoq, tassani ilaallutik akileraartarneq pillugu inatsisit patajaatsut, oqaluttuarisaanerullu takutippaa inatsisitigut aaqqissuussisimaneq patajaatsuullunilu tutsuiginartuusoq. Suliffeqarfimmit nunanut naalakkersuisuinullu suliffeqarfinnut atuititsisunut pisussaaffilersimavugut, qaqugukkulluunniillu inatsisitigut atuutitsineq akileraartarnikkut eqqartuusiveqarnikkullu ataqqillugit, Graham Hossie nassuiaavoq.
