London aamma Tokyo kabelimik attavilerniarneqartussanngorput

Immap naqqatigut kabeli Sullualukkoortinneqartussaq, kitaata sineriaa atuarlugulu Nunap Isuata eqqaatigoortussaq, suliffeqarfimmit Alaskameersumit Kodiak Kenai Cable Companymit piviusunngortinniarneqalerpoq.
januaarip 26-at 2010 09:59

Immap naqqatigut kabeli 15.000 kilometerisut takitigisoq Londonimik Tokyomillu attassusiisussaq. Aningaasartuutigineqartussat danskit koruuniinik 6 milliardinik naleqartussatut naatsorsuutigineqarpoq.

Immap naqqatigut kabelip Londonip Tokyollu akornanni nassiussinermi piffissaq atorneqartartoq affaanngortissagaa, suliffeqarfiup pisortaanerata Walt Ebellip oqaatigaa.

Issittumi sikup aakkiartornerata pissutaalluni pilersaarut piviusunngorsinnaalersimasoq, Walt Ebell oqarpoq. Ukiut qulikkaat qaanngiuppata issittoq sikuerussimassasoq ilisimatuut aamma naatsorsuutigaat.

Pilersaarut akuerineqassappat immap naqqatigut kabeliliineq 2011-mi aallartinneqassaaq aamma ukiut marluk atorneqassasut attaveqaatinik suliffeqarfiup naatsorsuutigaa.

suliassap piviusunngortinnissaa oqartussanit akuersissutigissappat Arctic Cable Company Kodiak Kenai Cable Companymit pigineqartoq, suliniummut aningaasaliisussarsiortussaavoq,

Nunatsinni Tele Greenlandip immap naqqatigut kabeliutaa siorna atorneqalersoq, tassunga sanilliukkaanni taamaallaat 4.780 kilometerisut takitigaaq 750 millioni koruunillu missaannik akeqarluni.