LOMROG III Qalasersuaq avannarlermut qanilliartorpoq
Juulip naanerani sikunik aserorterut Oden Svalbardimiit Qalasersuaq avannarleq tunaartaralugu aallarpoq. Qalasersuarmut avannarlermut angalanissami ilisimatuut ilisimassassarsiortut angalaqataapput, taakkulu Kalaallit Nunaata immap naqqatigut nunataanik misissuisussaassapput. Ilisimasassarsiotunut angalaqataavortaaq Danmarks Radiomit tusagassiortoq Martin Breum, Tannalu KNR-mit Rasmus Rasmussenimit oqaloqatigineqarpoq.
-Maannakorpiaq allorniusat sanimukartut malillugit 88-miippugut. Taassa Qalasersuaq avannarleq 200 km-inik ungasitsigalugu.Paasissutissanik katersuivugut, taakkulu paasissutissat Kalaallit Nunaata Danamarkillu 2014-imi qalasersuup avannarliup imartaanik piginnittussatut FN-imut piumasaqarnissaannut atorneqartussaassapput.Neriuutigaarput Lomonosovip qaqqartaai immap naqqatigut Kalaallit Nunannit Qalasersuaq Avannarleq tikillugu atassuteqassasut, tamatumanimi Kalaallit Nunaat Danmarkilu piumasaqarnissaminni sakkussaqarluassapput, Martin Breum oqaluttuarpoq.
Ilisimasassarsiortut paasissutissat takussutissatut katersugaat marluupput. Tassalu erngup nassataanik immap naqqani kiverarsimasunit takussutissat,aammalu Lomonosovip qaqqaasa immap naqqaniittut Kalaallit Nunaata nunavittaaninngaanneersuunerannik takussutissat.Taakkulu iluatsissappata naalagaaffeqatigiinnut siunissaq qaammassaaq.
-Kinnerit 4.000 meterinik itissuseqartumiittut ilisimatuunit misissorneqarput, taakkulu inerneri naammagineqarluarput, taakkumi qalasersuarmi avannarlermi immap naqqanik piginnittussaalernissamut piumaqarnissami nukittoqutaassapput. Kalaallit Nunataa Danmarkillu Qalasersuup avannarliup immaata naqqanik annertuumik piginnittussanngornissamik piumasaqarnissaq isumaqatigiissutigaat. Tamannali siunissami sumut atorneqassanersoq suli isumaqatigiissutaanngilaq. Kuupik Kleistip siusinnerusukkut oqaatiginikuua nammineq isummani malillugu issittup imartaa eqqissisimatsinneqassasoq. Danmarkimili immap naqqanik piginnittussangorneq sumut atorneqarsinnaanersoq suli isummerfigineqanngilaq, Martin Breum KNR-ip tusagassiortuanut Rasmus Rasmussenimut taama oqarpoq.
