Lomborgip 5 mio. koruuninik taperneqarnera puffassimaarutigaat

Silap pissusaa pillugu oqalliseqaataajuartup, Bjørn Lomborgip 2009-mi aningaasaqarnermut inatsimmi 5 milliuuninik immikkut taperneqarnera Folketingimi illuatungiliuttut puffassimaarutigaat.
novembarip 11-at 2008 18:14

Partiit arlallit isumaqarput, Naalagaaffiit Peqatigiit aappaagu silap pissusaa pillugu Københavnimi ataatsimeersuartitsinissaa, Bjørn Lomborgip iluatsinngitsoortissinnaagaa. SF-ip silap pissusaa pillugu oqaaseqartartua, Ane Grethe Holmsgård puffassimaaqaluni ilumoortuusaartoqarnerarpaa. Politikerit puffassimaarnerannut pissutaavoq, 2009-mi aningaasanut inatsisissap isumaqatigiissutigineqalivinnerani, Dansk Folkepartiimeersut Bjørn Lomborg taperusullugu iluatsitsinerat. Bjørn Lomborg immikut taperneqarpoq silap pissusaa pillugu aappaagu ataatsimeersuarnissamut aningaasarpassuarnik atuissamaaleruttortoq, naalagaaffiit imminnut piumaffigalutik aalajangiussaqarsinnaanissaat anguniarlugu. Immikkut Lomborgimut tapiissuteqarneq Socialdemokratinit illaruaatissaannartut isigaat. SF-imeersut akuerisinnaanngilluinnarnerarpaat, silap pissusaanik paasisanut akerliujuaannartup, ataatsimeersuarnermi angusanik aningaasartuutissartaanillu naliliisinniarneqarnera. Taamaalillutik EU-mi ilaasortat ilaasa, soorlu Polenip, EU-p silap pissusaa pillugu akisussaassusilimmik politikkeqarniarnera sanngiillisarniarlugu, Lomborgip saqqummiussai atornerlunniarsinnaammatigit. Dansk Folkepartiimeersulli isumaqarput iliuuseriniakkatut saqqummiuneqartut aningaasartuutitassaalu Lomborgip naliliiffigissappagit, pisariaqanngitsumik aningaasartuuteqalernissaq pinngitsoorneqarsinnaassasoq.