Loch Ness eriagisatut kingornutassanngortinnialerpaat

Nunarsuarmi uumasorujussuit tusaamasaarnerpaat ilaata Loch Nessimi uumasorujussuup- manna tikillugu suli timitarsivinneqanngitsup najugaqarfiatut ilisimaneqartup, Skotlandip avannaaniittup tasersuup Loch Nessip, UNESCO-p nunarsuarmi erigisassatut kingornutassat pillugit allattorsimaffiutaanut ilanngunnissaa Skotlanimiut sulissutigilerpaat,

Loch Nessip kingornutassanut ilanngunneqarnissaanut sulissutiginnittuupput Loch Nessip eqqaani najugallit tasersuup tusaamasaaneranik iluanaaruteqarlutik suliffiuteqartut.

Tasersuaq kingornutassanut ilannguttuuppat takornarianit isertitat 800 millioni koruuninik amerleriaateqassangaluartut eqqoriarneqarpoq.

Loch Nessimi umaasorujussuaqarneraaneq takornariaqarnermut iluaqutaalluarpoq, naallu umaasorujussuaq suli iluamik uppernarsivillugu takuneqarsimanngikkaluartoq takunnissimasorisut ikinngillat, Skotlandimi TV-qarfik STV taama tusarliussivoq.

Uumasorujussuarmik takunnikkusunneq suli ingasannerulerpoq, angut tuluit nunaanneersoq Loch Nessimut qanittukkut takornariartilluni tasersuarmi uumasumik suunersumik 15 meterinik takissusilimmik videoliuummut immiussimasaminik saqqummiussimmat.

Nunarsuarmi eriagisatut kingornutassatut isigisat allattorsimaffimmut ilanngutsinniarnerat ukiunik tallimanik sivisussuseqarsinnaasarpoq.

Nunatsinni Ilulissat sermeqarfiat allattorsimaffimmut ilaavoq, nunarsuarmilu eriagisatut kingornussassanut amerlangaatsiartorsuarnut ilaapput Islandimi Tingvallir, Egyptinami Faroet iliversui, USA-mi qoororsuaq Grand Canyon Kinamilu qarmarsuaq.