LNS-ip 200 millionit sinnerlugit kaaviaartitsinissani naatsorsuutigaa
Norgemi tusagassiuut highnorthnews.com.com taama allaaserisaqarpoq Suliffeqarfiup Leonhard Nilsen og Sønner, LNS, Qeqertarsuatsiaat kujaatungaanni Aappaluttumi rubinisiornerat aallartillualerpoq.
LNS-ip, ukiuni tullerni 30-ni piiaanissamut akuersissummik pigisaqartup, 2018-imi 150-235 millionit koruunit akornanni kaaviiaartitaqarnissani naatsorsuutigaa.
LNS-imi pisortaaneq, Frode Nielsen, highnorthnews.com-imut taama oqarpoq, rubinisiornermillu suliffeqarfiup tunisassiaata pitsaasutut nalilerneqarsimanerat aamma oqaatigaa.
- Tunisassiorneq ingerlalluarpoq, nutaanik aaqqiissuteqarnitsigut tunisassiorneq malunnaatilimmik annertusisinnaasimavarput, taamaammat ukioq manna kvartalimi kingullermi tuniniaanerup aallartissinnaanissaa neriuutigaarput.
Suliffeqarfiup tuniniaanermut immikkoortortaqarfianeersut Bangkokimi nittarsaassinermut angisuumut ulluni makkunani najuupput pisisartunullu isumaqatigiissuteqarsinnaassallutik neriuutigaat.
- Tamanna ingerlalluassappat, akillu neriuutigisagut angusinnaassagutsigit, taava 2018-imi 150-235 millionit koruuninik kaaviiaartitaqarsinnaanissarput neriuutigaarput, taamatuttaarlu aamma ukiuni tulliuttuni, Frode Nielsen highnorthnews.com-imut taama oqarpoq.