Ljungman Østre Landsretimut ingerlatitseqqippoq
IT Factoryp akiliisinnaajunnaarneranut atatillugu Mikael Ljungman pineqaatissinneqarami, ukiuni arfinilinni parnaarussivimmiittussanngortitaavoq. Aamma piginneqatigiiffinni, peqatigiiffinni aningaasaateqarfinniluuniit pisortaasinnaajunnaarlunilu siulersuisuni ilaasortaaqqusaajunnaarpoq.
Ljungmanip aningaasaatai Kinamilu aningaaserivinniittuutai minnerpaamik 50 millioni koruunit arsaarinnissutigineqarput. IT Factory-llu akiliisinnaajunnaarneranut atatillugu ullut 14-it qaangiutsinnagit 200 millioni koruuninik akiliisussanngortitaalluni.
- Pineqaatissinneqarnini akuerinngilaa. Ljungman pinngitsuusutut misigigami parnaarussaanissani akuererusunngilaa, taamaammat suliaq Østre Landsrettimut ingerlateqqippaa, illersuisua Ebbe Mogensen oqarpoq.
- Lyngbymi eqqartuussivik uppernarsaatissaqarani Ljungmanimik pisuutitsivoq. Stein Baggerip IT Factory ingerlakkallarmagu sullitaasa isumaqatigiissusiorfigineri - salluliuutaasut sianiginagit - Ljungman suleqataasimavoq, pisuunngilaq. Østre Landsretti allatut naliliissanersoq misilinneqartariaqarpoq, illersuisoq Ebbe Mogensen oqarpoq.
Unnerluussisup aamma nuannaarutigaa suliap eqqartuussivimmut qulliunerusumut ingerlateqqinneqarnera.
- Siullermik oqaatigissavara, Lyngbymi eqqartuussiviup pineqaatissiinera naammagisimaaratsigu. Uagummi unnerluussummut atatillugu angorusutagut anguagut. Pineqaatissinneqartulli suliaq Østre Landsretimut ingerlateqqippaa. Taamaammat suliaq suli aliikkutarigallassavarput, unnerluussisoq Per Justesen oqarpoq.
Stein Bagger juuni aqqaneq-aappaani 2009-mi ukiuni arfineq-marlunni parnaarussivimmiittussatut pineqaatissinneqarpoq maannalu Vridløselille Statsfængsel-imiilluni, DR taama ilanngutassiivoq.
