Live 8 KNR-TV-mi

Nunani assigiinngitsuni qulini, tusarnaartitsivinni aamma assigiinngitsuni qulini, nipilersornermik rockimik nunarsuaq tamakkerlugu tusarnaartitsinersuaq ullumikkut aallartippoq – taaguuteqarluni Live 8.

Nunat suliffissuaqarfiusut pisortaasa Afrikami piitsuuneq akiorniarlugu suliniuteqarnerat annertusarniarlugu tusarnaartitsinersuaq ingerlanneqarpoq.

Tusarnaartitsineq tv-kkut, radiokkut internetikkullu nunarsuaq tamakkerlugu innuttaasut 85 procentiisa malinnaavigisinnaagaat, aaqqissuisut nalunaarput.

Tusarnaartitsinernut isornartorsiuisartut oqaatigaat, Live 8-mik taallugu tusarnaartitsinerit anguniagaat tassaasoq, nipilersortartut nipilersugaasa tuniniarneqartarnerisa annertusarneqarnissaat.

Tusarnaartitsinerit KNR-TV-kkut immikkoortuni marlunni takutinneqartussaapput. Siulleq aallartereerpoq, tassa nal. pingasunut tanneq aqqarngup missaani aallartikkami, ualerulu arfinermut tanneq qulingiluat naammassissalluni.

Tusarnaartitsinerit immikkoortuisa aappaat unnugu unnuap’qeqqanut tanneq arfineq’marluk aallartissaaq ullaassaru pingasut qaangerlugit tanneq ataatsip tungaanut aallakaatinneqassalluni.