Littauer unnerluutigineqarpoq

Karen Littauer Qaanaami meeqqap aatagisaata ajuallatsitsisimasutut unnerluutigimmagu Kalaallit Nunaanni Politiit eqqartuussassanngortippaat.

Littauerip unnerluutigineqarneranut pissutaavoq naalungiarsuk meningitisertoq aataminit nakorsiunneqartoq oqaluttuaralugu oqarsimammat meeqqap angajoqqaavi aalakoorlutik napasinnaanngimmata aataasup nakorsiussimagaa. Qaanaarlu inukeqimmat ilaqutariillu ilisarineqarsinnaammata, tamanna meeqqap aataata ajuallatsitsinertut unnerluutigaa.

Karen Littauer upernaaq qaammatit pingasut, Red Barnetip isersimaartarfiutaani meeqqat inuusuttullu pillugit suliaqarpoq, Danmarkimullu angerlarami meeqqat sumiginnagaasut tusagassiuutitigut oqaluttuarai.

Littauer nammineq oqarpoq ilaqutariit kikkulluunniit immikkut eqqartornianngikkaluarlugit misigisimalluni unneqqarissumik takusani oqaluttuarisariaqarlugit.