Littauer tunuarpoq
Danmarkimi Peqatigiiffik Kalaallit Meerartaat-ni siulersuisut, Karen Littauerimut tunuaqqusillutik kajumissaarereersullu, Littauer ataatsimiititaliami ilaasortaajunnaarpoq.
Taamatut aalajangerneq Karen Littauer paaseqatigalugu aalajangernerusoq, peqatigiiffimmi siulittaasoq Mads Thyregod allappoq.
Peqatigiiffimmi generalsekretæri Marianne Jensen oqarpoq, taamatut aalajangerneq oqaaseqarfigiumanagu, aalajangernerli suliniarnermut sunniuteqarnavianngitsoq oqarpoq.
- Aalajangerneq taanna bestyrelsemi pivoq, taamaattumik bestyrelsep aalajangernera uanga oqaaseqarfigissanngilara. Annertunerusumilli sunniuteqarnissaa naatsorsuutiginngilara, Marianne Jensen oqarpoq nangillunilu: - Tassanngaanniit ingerlaqqittariaqarpugut, neriuppungalu tassani aamma nunatsinni Danmarkimilu suleqatigut peqatigalugit ataqqeqatigiilluta sulisinnaajumaarluta.
Karen Littauerip allagai tamanut ammasuunngitsut DR-imi tusagassiortumut nassiussimasai internetikkut tamanut nittarsaanneqareersullu, tusagassiutitigut oqallinneq maajip qaammataani aallartippoq, tamannalu ilaatigut Qaanaami imigassaarniarnermik matusigallarnermik kinguneqartitsivoq.
Karen Littauerip Orto Ignatiussenillu oqallisaasimanerat Peqatigiiffimmi Kalaallit Meerartaani suliniarnermut ajoqutaasinnaanera pinerullugu tunuarneq pisimasoq, Peqatigiiffik Kalaalit Meerartaani siulittaasoq Mads Thyregod Karen Littauerilu nalunaarumminni allapput.
