Lissabonimi isumaqatigiilluni aalajangersagaq Tjekkiami akuerineqarpoq

Lissabonimi isumaqatigiilluni aalajangersagaq Tjekkiami eqqartuussiviit qullersaannit maanna akuerineqarpoq, nunap inatsisitigut aaqqissuussaaneranut akerliunngitsoq oqaatigineqarluni.
Allattoq Mads Lynge
novembarip 03-at 2009 08:58

Tjekkiap præsidentiata Vaclav Klausip isumaqatigiilluni aalajangersagaq taamaasilluni atsiorsinnaanngorpaa, aalajangersagarlu atortussanngortinneqarsinnaalissalluni, aviisi Politikenip nittartagaani taama allaaserinnittoqarpoq.

Senatorit arlallit oqaraluarput Lissabonimi isumaqatigiilluni aalajangersagaq nunap inatsisitigut aaqqissuussaaneranut akerliusoq, taamaammat præsidentip Vaclav Klausip aalajangersagaq atsiorusussimanngikkaluarpaa. Nunat EU-mut ilaasortat 27-t tamarmiullutik Lissabonimi isumaqatigiissut aatsaat akuerereerpassuk atortussanngortinneqarsinnaavoq, Tjekkialu nunani kisiartaalluni isumaqatigiissummik akuersisimanngikkaluarpoq.