Lions Club ilaqutariinnut kisermaanullu tunissuteqarput
Lions Club Nuuk ukiuni 30-ni kingullerni immikkut ittumik juullilernerani Kommuneqarfik Sermersuumi innuttaasunut aningaasaqarniarnikkullu ajornartorsiuteqartunut nerisassanik juullisunnittunillu allanik agguaassisarpoq.
Taama oqaluttuarpoq Lions Club Nuup siulittaasua, Abia Abelsen.
Nuummi innuttaasut suliffeqarfiillu namminneq piumassutsimik aningaasanik tunisinerisigut aningaasat 70.000 koruunit missaanniittut ukioq manna katersorneqarsimapput. Tassalu taakku ilaqutariinnut aningaasatigut ajornartorsiornerusunut juullisunnitsunik agguaassinermut atorneqartussaassallutik. Ilaqutariit kikkut pisariaqartitaqarnerunersut kommunip inunnik isumaginnittoqarfianit toqqarneqartartut, Abia Abelsen oqarpoq.
Illaqutariit kisermaallu Paamiuni Ittoqqortoormiinilu taamatullu nunaqarfinni Kapisilinni Qeqertarsuatsiaanilu najugaqartut aappaagu juullilernerani tunissuteqarfigineqassapput.