Lions Club ikiuiniarnermut aningaasanik tunissuteqarpoq
Haitimiorpassuarnut nerisassanik, imermik nakorsaatinillu massakkorluinnaq amigaateqartunut angerlarsimaffeqanngitsunullu, Lions Clubip Nuummi immikkoortortaqarfia 16.000 koruuninik tunissuteqarpoq.
Nunap sajorujussuarneranit eqqugaasunut, Danmarkimi Lions Clubip 500.000 koruuninik ikiorsiiniarneranut Nuummi Lions Club aamma tapiissuteqarpoq.
Nuummi Lions Club tamatuma saniatigut, siunertamut allarluinnarmut, aningaasanik ualeru tunissuteqarniarpoq - tunissuteqarfigineqartussaq tassaalluni Nuummi meeqqat inuusuttuaqqallu ornittagaat Mælkebøtten.
Mælkebøttenip allissutissaanik ualeru nappaanersiornermut atatillugu 100.000 koruunit tunniunneqassapput.