Lions Club agguaalerpoq
Nuummi Lions Club-i juullilernerani pajuttuinissamik pilersaaruteqarpoq.
Ilaqutariit 30-t decemberip 23-ani koorinik juullisunnitsunik imalinnik 1.000 koruuninillu nalilinnik pajunneqassasut, Lions Clubimi ilaasortaq peqatigiiffimmilu sammisassaqartitsinermut isumaginninnermullu ataatsimiititaliami siulittaasoq Abia Abelsen oqarpoq.
Lion Club Nuup Kommuneanik suleqateqarluni agguaassissaaq, taamaaliortarnerlu ukiut tamaasa pisarpoq, ilaqutariit pisariaqartitsisut juullerpalaarluarnissaannut periarfissikkumallugit.
Qeerlutuunut, kaffenut allanullu juullisunnitsunut pisiortornermut aningaasat 35.000 koruuninit 40.000 koruunit tungaannut atorneqassapput.
Lions Clubimit Peter Frederik Rosing nassuiaavoq, ilaqutariinnut koorinnattussanut sianertoqaqqaarneq ajortoq, decemberilli 23-ani agguaassisoqartartoq.
Angerlarsimasoqanngikkaangat kingusinnerulaartukkut misileqqinneqartartut nassuiaavoq, naammattuugassaanngippatali ilaqutariinnut allanut imaluunnit utoqqaat illuinut koorit tunniutiinnarneqartarput. Peter Frederik Rosing aamma oqarpoq, ilaqutariit pajunneqartut tamarmik nuannaartaqisut.
