Linda pillugu persuarsiorniarnerit luatsinngitsoorput

Erinarsorluni TV-kkut unammersuarnermi, X Factorimi, ajugaasoq, Linda Andrews, Savalimmiuni nalliuttorsiornertalimmik nuannattorpassuarnillu ippassaq tikilluaqquneqartussaagaluarpoq, taamaalinanili siullermik Norgimut pivoq, kingornalu Islandiliarluni.
Allattoq Mads Lynge
apriilip 02-at 2009 06:08

Lindap persuarsiornartumik tikilluaqquneqarnissaanut Savalimmiuni suna tamarmi piareeqqagaluarpoq, Lagmandi Kaj Leo Johannesen, Torshavnimilu borgmesteri naasunik nassarlutik timmisartoqarfimmi utaqqigaluarput. Timmisartoq Lindap ilaaffigisaa Vagarip timmisartoqarfianut nunninnialersorlu silaannaq anorimit ima aalarulutsigaaq, timmisartup minnissaa timmisartortartup taamaatiinnarlugu Norgimi Bergenimukaannarnissani aalajangiuttariaqarlugu.

Timmisartumik allamik Norgimiit Torshavniliartoqarnissaanik Lindap utaqqinerani Savalimmiuni pilersaarutit allanngortinneqartariaqarsimapput, imaalillugit, Linda pisiniarfiit ilaanni sivikitsunnguamik tusarnaartitsisussanngorlugu. Tamannali aamma iluatsinngilaq.

Timmisartormi Bergenimiit Savalimmiunut nunninnialersorlu sila kingumut qinngasaarivoq. Timmisartortartoq tamatumuuna aalajangerpoq, Islandimi Keflavikiliartariaqarluni, Savalimmiunilu pilersaarutit tamarmik ullumikkumut kinguartinneqarallarput.