Libyamiu aqqutissaminit nigortoq
Angut Canadamut ingerlaqqinniarluni tissiartaammik Islandikkoorluni Danmarkimit Nunatsinnut angalasimavoq.
Politiinspektør Finn Jeppesenip oqaatigaa, tissiartaammik angalasimanissaa upperinagu, angutillu Libyameersup allamiut Canadaliarniarlutik Air Greenlandip Iqalunnut timmisartuussisarneranik atorluaaniartut ukiormanna arfineq marlussarigaat.
- Maannamut inuit arfineq marluk tigusaraagut, taakkulu isumaqarsimapput Kalaallit Nunaannit Canadamut ajornaquteqanngitsumik ingerlaqqissinnaassallutik. Politiilli Canadamut angalaniartut tamaasa nakkutigisarpaat, taamaaliornikkummi Schengenip avataanut aallartoqassammat taamaattumillu passi visumilu pisariaqartinneqarlutik, Finn Jeppesen Radioaviisimut oqarpoq.
Allamiut Nunatta silaannaata nillernera aammalu allarluinnarnik aqqutilersuuteqarnera, soorlu assersuutigalugu illoqarfiit akornanni aqqusineqannginnera, Nunatsinnut tikinnerminni aatsaat paasisarpaat, politiit sapaatit akunneranut qaangiuttumut nalunaarusiaminni taama allapput.
Angut Libyamiu Allamiut pillugit inatsit naapertorlugu nunamit anisitaanissaa siunertaralugu tigusarineqarpoq.
Eqqartuussiviup tigummigallarneqarnissaanik aalajangiinera angutip akueraa kingornalu Danmarkimi suliap ingerlateqqinneqarnissaa siunertaralugu paarsisulerlugu aallartinneqarluni.
