Libyami toqutaasut amerliartorput

Nakorsat takunnissimasullu aamma ilisimatitsissutigaat 900-nit amerlanerit ikiligaasimasut. TV-qarfiit BBC aamma al-Jazeera taama nalunaarput.

Libyap kangisissuani illoqarfimmi Benghazimi pisut ajornerpaapput, ippassarmi inuppassuarnik ilisinerup nalaani sakkutuut isumallaallisaasut inuppassuit aallaallugit toqorarpaat.

Muammar Gaddafip ukiorpassuarni kisermaassilluni aqutsinera akerliussutsimik takutitsinernut pissutaavoq, eqqissiviilliornerillu pingasunngormat aallartipput, uanilu sapaatip-akunnerata naanerani suli sakkortuseqqinnerullutik.

- Ikiligaasimasorpassuit passutagut tamangajammik niaqqumikkut, qatiggamikkut sakissamikkullu ikeqarput, nakorsaq Braykamik imminut taagortoq TV-qarfissuarmut BBC-mut oqarpoq. Nakorsaq arnaq taanna Benghazimi napparsimmavimmi sullisuuvoq.

Sakkutuut isumannaalisaasut qanoq peqqarniisaartiginersut takunnissimasunit oqaluttuarineqarpoq, oqimaatsorsuarnik sakkulerlutik akerliussutsimik takutitsisut sakkulersorsimanngitsut saassutarisarsimavaat. Sakkutuut aallaasinik, qamutilinnik raketsinillu sakkoqarsimasut, tusarfiit oqarput.

Suliffissaqarneq, inuuniarneq pitsaanerusoq, kiffaanngissuseqarneq politikkikkullu aaqqissuusseqqinneq akerliussutsimik takutitsisut piumasaraat.

Libyamiit nalunaarutit qularnartortaqarput. Aviisiliortut nunanit allaneersut Libyamut iseqqusaanngilluinnarput, tusagassiorfiillu naalagaaffimmit aqunneqartut eqqissiviilliornerit eqqartunngisaannarpaat.

Akerliussutsimik takutitsisut sumulluunniit atassuteqaqqunagit internetsi tusagassiorfiillu tamaasa oqartussaasut aamma matusimavaat.