Libyami oqartussat tupaallatsitsipput

Libyami qinersisoqarnissaanik politikkikkullu ingerlatsinikkut allannguisoqarnissaanik neqerooruteqartoqarpoq, taamaalilluni Gaddafip nunap siuttuatut ingerlaannarsinnaanissaa, innuttaasunit aalajangerneqarniassammat. Libyami naalakkersuisut oqaaseqartittagaat ullumi taama oqarpoq.

-  Libyamiut qanoq iliornissaat nunat allat qanoq ilillutik aalajangersinnaagamikku?  Libyami pisortaq ataannassanersoq imaluunniit peersitaassanersoq Libyamiut aalajangertariaqarpaat, oqaaseqartitaq oqarpoq.

Kisianni iliuuseriniagaq tamanna Libyami pikitsitsisunit Kangianilu qiterlermik immikkut ilisimasalimmit Helle Lykke Nielsenimit DR-imit oqaloqatigineqartumit  qulartumik isumaqarfigineqarpoq.

- Allannguisoqarnissaanik aatsaat neriorsuuteqartoqarpoq. Tamannalumi pitsaasuuvoq. Ukiorpassuarnili misilittagarineqalersut ersersippaat, Gaddafi imminut iluaqutissaminik taamaallaat iliuuseqartartoq. Soorunami maannakkut tatisimaneqarpoq taamaattumillu tatineqarnerminut oqilisaataasussamik maannakkorpiaq saqqummiussaqarluni, Helle Lykke Nielsen oqarpoq.

Siunnersuutillumi pikitsitsisut Nato-lluunniit sakkutuui qaartartumeerisarnerminnik unitsitsinissaannut tunngavississaneraat, Helle Lykke Nielsenimit ilimagineqanngilaq.

-  Gaddafip taamatut siunnersuuteqarnera soorunami upperiinnarneqarsinnaanngilaq. Siunnersuut pimoorunneqassappat Gaddafi neriorsueqqaartariaqarpoq, Helle Lykke Nielsen oqarpoq.
Libyami pikitsitsisut Gaddaffi ilaqutaalu pillugit isumaqatigiissuteqartoqarsinnaanissaa manna tikillugu peqataaffigerusunngilaat.