Libyami akerliuniartoqartuarpoq
Libyami naalakkersuisunut nunallu kisermaassilluni naalakkersuinut ukiuni 40-ni siuttuusumut, Muammar Gaddafimut peqqarniitsumik akerliuniartoqartuarpoq.
Illoqarfiit pingaarnersaanni Tripolimi inuiaat inersuaat, inatsisartut allaffeqarfiat ikuallattoq akerliussutsimillu takutitsisut ullaap tungaa saassuppaat, Gaddafillu tunuarnissaa piumasaralugu.
Gaddafimmi erneri arfineq marluk, ataatamisulli killeerusimaartarnitik tusaamanerlugaassutigaat.
Gaddafip kingoraartissani kinaassanersoq oqaatiginikuunngisaannarpaa. Ernerali angajulliip tullia, 38-nik ukiulik Saif al-Islam Gaddafi TV-kkut ippassaq oqalugiareernermi kingorna kingoraartissatut isigneqarluarsinnaavoq. Saif illunik titartaasartutut ilinniarnikuuvoq, inuusukkallaramilu tulluusimaarutigeqisaminik sisamanik tigeriuteqarnikuuvoq kissaviarsuutinilu atorlugit piniarneq nuannareqalugu. Kingorna ataatani isumaqatigiunnaaraluariarlugu uterami avatangiisinik illersuiniarneq sammilerpaa. Ippassarlu tassa nutarterisoqarnissaanik TV-kkut neriorsuivoq, aammali ataatami piumasaa malinneqanngippat aattaqaqisumik inuiaat sorsuutilernissaat qunusaarutigalugu. Qatanngutigiit akullersartik, Mutasim pissaaneqartortaraat. Taanna ataatamisulli sakkutuutut ilinniartuunikuuvoq nunamilu isumannaallisaanermut ataatsimiititami siulittaasuulluni. Taamaammallu USA-p nunanut allanut ministeria Hillary Clinton ukiut marluk matuma siorna Washingtonimi ataatsimeeqatigalugu.
Qatanngutigiit perlequjaartaraat Hannibal. Taanna ukiut arfineq marluk matuma siorna Københavnimi Handelshøjskolimi atuarnermi nalaani Parisimi aalakoorluni Poscheminik aqqusinikkut killormut ingerlalluni tigusaavoq. Tamatumalu kingorna arnaatini persuttartarlugu Parisimi Genevemilu tigusaasarpoq. Kingullermik peqqarniissimanermik Schweitzimi ulluni marlunni paarnaarusimaarneqarpoq. Tamanna ataataata kamaatigigaaramiuk illernartumik Schweitzimut sorsunnissi eqqartorlugu Nunat Tamat Peqatigiifianut allagaqarpoq Schweitzi nungullugu Tyslandip Frankrigip Italiallu akornimini agguaatissagaat piumasarigaluarlugu.
TV-qarfimmiit Al-Jazeeramiit nutaarsiassiisut kingulliit oqaatigaat Tripolimi ullumi inuit 61-it toqutaasimasut, naalakkersuisullu allaffeqarfii arlallit ikuallatsinneqarsimasut.
Perulluliornerit sisamanngormalli aallartimmata inuit 200-niit 300-t pallillugit toqutaasimanissaat suliniaqatigiiffimmit Human Rights Watchimit ilimagineqarpoq.
