Libanonip kujasissortaani akersuuttoqaqqippoq
Libanonip kujasinnerusortaani ullumi akersuuttoqaqqippoq. Israelimiut tusarfiit tutsuiginartut naapertorlugit Libanonip kippasinnerusortaani aamma akersuuttoqarpoq.
Biilit kuussuup Litanip kujataatigut ingerlasut israelimiunit saassunneqartarnissaannik kalerrisaariniarlutik israelimiut sakkutuui naqitanik kalerrisaatissianik timmisartumiit ullaaq manna Libanonip kujasinnerusortaanut nakkaatitsipput. Sakkuaakkunnaartoqarpat israelimiullu Libanonimit anippata Libanonimi naalakkersuisut Libanonip kujasinnerusortaani 15.000-inik sakkutuuliiniarlutik neqeroorput.
DR-ip Jerusalemimi tusagassiortuata, Kim Bihlsøe Lassenip neqeroorutip nalunaarutigineqarnerata kingorna qanoq qisuariartoqarnersoq ima oqaluttuaraa:
- Israelimiut naalakkersuisuisa siulittaasuata Ehud Olmertip siunnersuut soqutiginarpaa. Innuttaasulli amerlanerit Libanonimiut sakkutuuisa 15.000-t hizbollahkkunnik eqqissisimatitsisinnaanissaat qularaat, Kim Bihlsøe Lassen oqarpoq.
Israelimiut sooq taama qulartiginersut aperineqarami akivoq:
- Libanonimiut ukiorpassuarni taamatut sakkutuuliinissaminnik periarfissaqarnikkuullutik sooq aatsaat manna taamatut neqeroornerat paasiuminaatsinneqarpoq. Taassumalu saniatigut Libanonimiut sakkutuui hizbollah-kkut sakkuuinut sanilliullutik piginnaasakinnerupput sakkuilu sakkukinnerullutik. Tamanna israelimiut nalunnginnamikku Libanonimiut kisimiillutik hizbollah-kkunnik eqqissisimatitsiniarsinnaanerat qularivaat. Tamanna tunngavigalugu nunat tamat sakkutuuliinissaat israelimiunit origineqarneruvoq, Kim Bihlsøe Lassen oqarpoq.
