Libanonimi sakkutuuliinissaq Israelimiunit akuerineqaleriartorpoq
Nunat tamat sakkutuuisa Libanonimi eqqissisimatitsiniarnissaat Israelimiunit akuerineqaleriartorpoq. Israelimi naalakkersuisut siulittaasuata Ehud Olmertip sakkutuut EU-minngaanneernissaat kissaatigaa, Israelimilu illersornissamut ministerip sakkutuut NATO-minngaaneernissaat siunnersuutigalugu.
DR-ip Libanonimi aallartitaa Ole Sippel Israelimiut akuerinnnikkiartornerat pillugu ima nassuiaavoq:
- Israelimiut Hitzbollah-kunnik nungusaaniarlutik qaartartumeerisaqattaarnerminni sakkutuujunngitsut toqoraleramikkik innuttaasunit nunarsuarmioqatigiinnillu amerliartuinnartunit sakkortuumik isornartorsiorneqartarnertik tunngavigalugu sakkutuuliinissaq ornigineruleriartorpaat. Israelimiut Hitzbollahkkut piuneerunniarunikkik amerlasuunngorlutik Libanonimut isaasariaqarput. Israelimiut siusinnerusukkut Libanonimi misilittakkatik nuanniitsut tunngavigalugit tunuarsimaarput allamiullu sakkutuuisa eqqissisimatitsiniarnissaat taamaalillutik orniginerulerlugu, Ole Sippel oqarpoq.
Taamatut sakkutuuliisoqassappat illuatungeriit akuerisaannik aatsaat sakkutuuliisoqarsinnaasoq sakkutuullu sumiut eqqissisimatitsiniartussatut sakkutuuliunneqarnissaat ilisimaneraa apeqqutigineqarmat ima akivoq:
- Apeqqut taanna akiuminaatsorujussuuvoq. Israelimiut namminneq EU NATO-lu eqqaallatsiarpaat. EU-mi nunat arlallit ilaasortaatitaqartut tunuarsimaarput. Nunalli eqqissisimatitsiniarlutik akuersisut illuatungeriinnit akuerineqaqqaarlutik aatsaat eqqissisimatitsiniarsinnaapput. Tamat sakkutuuliussassanik akuersitinniarnissaat imaannaanngitsuussaaq, Ole Sippel naggasiivoq.
