Libanonimi piaartumik suliarinneqqusipput
Israel-ip Libanon-ip kujataanik tiguaariataarsinnaanera, danskinik suli taqqavaniittunik qimarngutitsisoqarnissaanik tuaviortumik suliarinneqqusisoqarpoq. Ilimagineqarpoq danskit ikinnerpaamik 250-it suli nunaqarfinni nikeriarsinnaanatik, Libanon-ip kujataaniittut.
Meeqqat Libanon-ip kujataaniittut Danskit nunanut allanut ministereqarfiata annilaangatigineruai. Meeqqat angajoqqaatik ilaginagit Libanon-imiittut, taamaammallu uppernarsaatinik allagartaqanngitsut, soorlu pas-inik paarisaqanngitsut, pineqarput. Meeqqat taakku angajoqqaavi sulillutik angerlarsimaannartut, ilaquttaminni feriarsimasinnaapput. Ajornartorsiutaavorlu uppernarsaatinik allagartaqarnani Danmark-iliartoqarsinnaanngimmat. Taamaammat Danskit nunanut allanut ministereqarfiata allatut iliorluni ajornartorsiut qaangerniartariaqarpaa.
- Danskisut oqalukkunik, tusaaneqarsinnaallutillu Danmarkip sua’tungaaneernersut, taava qularutiginngivipparput danskisut allatulli ikiorneqassasut. Ajornartorsiutaavortaaq meeqqat nassaarinissaat. Ilaqutaasut Danmark-imiit Libanon-imiilluunniit sianerlutik oqaraangata meeraq danskeq uppernarsaatissaqanngitsoq, angerlartinnissaa suliarisarparput.
Danskit Nunanut allanut ministereqarfiata allassimasuutiginngilaa massakkumut meeqqat qassit angerlartinnissaannik ikiorneqartariaqarsimanersut.