Libanonimi nipaaqaaq

Libanonimi sakkuaakkunnaarneq nalunaaquttap akunnerisa arfinillit matuma siorna – uagut nalunaaqutarput malillugu ullaaq nalunaaqutaq pingasunut – atuutilerpoq. Naalagaaffiit Peqatigiit inassuteqaataat israelimiunit akuersissutigineqarmat taama pisoqarpoq.

Libanon arfininngormat siulliulluni akuersivoq, israelimiullu naalakkersuisui ippassaq aamma akuersillutik.

Sakkuaakkunnaarnissap akuersissutigineqannginnerani israelimiut sakkutuui Hizbollah-kkullu Libanonip kujasissuani sakkuaapput. Beirutip avataatungaani illoqarfiit timmisartunit aamma saassunneqarput, Hizbollah-kkullu Israelip avannarpasissuanut raketsinik 250-nit amerlanernik aamma saassussillutik.

Qamutillit nipaarutillarmata qanoq eqqissisimanartigisoq nutaarsiassaqartitsiviit tamavimmik ullaaq manna sammivaat. Sakkuaakkunnaarnerlu illuatungeriinnit pimoorunneqartoq paasinarpoq.

Malinnaasulli isumaqarput, sakkuaakkunnaarneq ataavarssagunanngitsoq. Hizbollakkut pisortaata, Hassan Nasrallah-p nalunaarutigereerpaa, suliniaqatigiiffiup isumaqatigiissut attatiinnarniaraa, aamma kisianni oqarluni, israelimiut sakkutuui Libanonimiikkallartillugit Hizbollah-kut akersuuttuassasut.

Hizbollah-kkut sakkuiarneqarnissaannik Naalagaaffiit Peqatigiit inassuteqaataat siumut ajornartorsiortitsilersinnaavoq. Hizbolla-kkut Libanonimi ministeriisa marluk sakkuiarneqarnissami oqallinnermut peqataaniaratik paasisitsissutigereerpaat.