Libanonimi ministeriuninngortoq iluarineqanngilaq
Mikati, miliarderpassuarnik aningaasaatilik, Libanonimi pisuujunerpaat ilaattut isigineqartoq, inatsisartuni qinersinermi 68-init taaneqarpoq, unammillertaa Saad Hariri 60-init taaneqartoq.
Mikati Libanonip ministeriuneratut 2005-imi tunuartineqarpoq, Rafik Haririp toqutaanerata kingoarna nunanit killernit tapersersorneqartut akerliussutsimik takutitseqattaareersullu.
Biilit ikuallattut libanonimiullu akerliussutsimik takutitsisut tusagassiorfinnit takutinneqaqattaarput. Ministeriunertut tunuartinneqartup Saad Haririp tapersersortaasa Hizbollahmeersut anngiortumik pissaanermik tigusisimanerarpaat. Alapernaatsulli nalunaarput pissaaneqartut nikeriarnerat naalagaaffiup inatsisai naapertorlugit ingerlanneqarsimasoq.
Hizbollahmik tapersersuisup ministeriuninngornissaa aamma nunat allat naalakkersuisuinit isumakulunnartinneqarpoq. Ministeriuninngortoq Hizbollahmut ilaasortaanngikkaluarpoq tapersersuisuunaniluunniit. Taamaakkaluartoq shiamuslimit suliniaqatigiiffianniit atorfimmut siunnersuutigineqarsimavoq.
Shiamuslimit suliniaqatigiiffiat aqqutigalugu Iranip Libanonimi sunniuteqarnerulernissaa alapernaatsunit annilaanngatigineqarpoq. Taakungannga maannakkut politikkikkut inissisimaneq Gazamut, islamisiortut Hamasip pissaaneqarfigisaanut, assersuunneqarpoq.
Mikati sisamanngorpat naalakkersuisunngortitseriassaaq.
