Libanon pillugu isumaqatigiissuteqartoqalerunarpoq

Allattoq Mads Lynge
aggustip 08-at 2006 05:10

Israelip Hizbollah-llu akornanni akersuunneq unitsinniarlugu, Naalagaaffiit Peqatigiit isumannaallisaaniaqatigiivisa aalajangersakkamik isumaqatigiissuteqarnissaminnik qanittorujussuanngorput.

Tysklandip nunanut allanut ministeria Frank-Walter Steinmeyer, Kangianut Qiterlermukalinnginnermini taama oqarpoq.

Steinmeyerip oqaasii malillugit, nunat tamat Libanonip kujasissortaani eqqissisimatitsisussanik sakkutuuliisinnaassappata aatsaat, Israelip Libanonillu akornanni akiuukkunnaarallarnissamik isumaqatigiissuteqartoqarsinnaavoq.

Tamanna pillugu Naalagaaffiit Peqatigiit isumannaallisaaniaqatigiivini kingusinnerpaamik aqagu taasisoqarsinnaanissaa tuluit ministeriunerata, Tony Blair-ip, neriuutigaa.