Libanon-imi saassussinerit pipput

Libanon-ip avannaatungaani ullaaq manna libanon-ip sakkutuui sakkulersortartullu Al-qaeda-mut attuumassuteqartinenqartut, akornanni saassussinerit allartinneqarput.

Libanon-imi illoqarfimmi Tripolimi saassussisoqarnerani ikinnerpaamik sakkutuut tallimat toqutaapput.

Ullaaq Libanon-ip avannaatungaani Tripoli-mi saassussinerit pimmata qanngulussuaq kisimi tusarsaasimavoq. Toqutaasut, tassaanerupput Libanon-ip sakkutuui, aammalu peqqarniisaarnianut Al-qaedanut attuumassuteqartut sakkulersortartut Fatah al Islam-imeersut.

Sakkulersortartut, Fatah al-islam-imeersut aningaaseriviit ilaannut tillinniartut ullaaralaaq naammattoorneqarmata, saasussinerit siulliit Tripolimi aallartinneqarput. Tillinniat tunniutiinnarumanatik aqqusinermi aallaasersorlutik akersuutilersimapput.

Fatah al-Islamimut attuumassuteqartut allat saassussineri allat Palæstinamiut qimarnguiani aallartinneqarsimapput. Tassani sakkutuut pingasut toqutaasimapput. Libanonimi nutaarsiassaqartitsiviit ilaannit oqaatigineqarpoq, sakkulersortartut pingasut saassussinerni toqutaasimasut.

Isumaqatigiissutit malillugit, Libanon-ip sakkutuui Palæstinamiut qimarnguiinut iseqqusaanngillat, taamaakkaluartoq, qimarnguiit silataaannut sakkutuut amerlanerusut, qimarnguiit silataannut inissinneqarsimapput, februarip qaammataanni sakkulersortartut Palæstinamiut qimarnguianiissorineqartut, bussinik marlunnik Libanon-imi qaartartumeerereersullu.

Libanon-imi naalakkersuisut avissaartuulluinnarsimapput, ilaat kristumiuupput, ilaallu shia-musliimiunngikkunik sunni musliimiullutik. Syriamik illersuinissaq eqqarsaatigalugu naalakkersuisut avissaartuuteqqapput. Syriamik illersuinermut akerliusut tassaapput, kristumiut, sunnimusliimillu, taakkualu USA-mit tapersersorneqarput. Shia-musliimilli Syriamit Iranimillu tapersersorneqarput. Ilimagineqarporlu Syriamut illersuisut peqqarniisaarnianut Al-Qaeda-nut tapersersuisuusut, oqariartuutillu Syriamiut oqariartuutigisartagaat, Al-Qaeda-p nittartagaani takussaasalersimapput.