Libanon-imi illuatungeriit isumaqatigiissuteqarput

Libanonimi siuttut Qatarimi ulluni tallimani isumaqatigiinniareerlutik Beirutimut angerlalerput, aqagulu præsidentissaminnik toqqaasinnaassasut neriuutigineqarpoq.

Illuatungeriit isumaqatigiissuteqarnerisigut naalakkersuisunut illuatungiliuttut Hizbollah-meersut pissaaneqaqisut, Syriamiit Iranimiillu tapersersorneqartut, amerlanerussuteqanngikkaluarlutik naalakkersuisut siunnersuutaannik itigartitsisinnaatitaalissapput. Hizbollah-meersut sakkuuterpassuatik tigummiinnarsinnaagaat isumaqatigiissutigineqaraluartoq, neriorsuitinneqarput kingorna Libanonimioqatiminnut atoqqinngisaannassagaat. Syriamiut isumaqatigiissummut tapersersuillutik nalunaareerput, tamannalu eqqumiigineqanngilaq, isumaqatigiissuteqarneratigummi Libanonimi naalakkersuisut Syriamut akeqqersimaartuarnerat malunnarunaartussanngormat. Libanonimi ministeriunerusimasup, Haririp 2005-imi toqutaaneranut Syria akisussaatinneqarluni avoqqaarineqartuaraluarpoq, pillaaniartoqarnissaanullu Syriamiut aarleriuarsimagaluarlutik. Libanonimi inatsisartut isumaqatigiinneratigut eqqissinissaq neriunarsigaluartoq, pissutsit allanut sanilliukkaanni najummasinarallassapput. Libanonimmi eqqaamiui, Israeli Syrialu Libanonimi pissutsinut akuliunniartuarput, taakkualu saniatigut naalagaaffiit pissaanilissuit, USA Iranilu kangiani qiterlermi sinniisuutitaqartutullusooq pissaaneqarneruniuttuarput. Libanonimi illuatungeriit isumaqtigiissuteqarnerat pissutsinik allanngortitsissanersoq suli nalunaraluartoq eqqissineqarnissaa neriunarsivoq.