Letlandimi talerperliit naalakkersuisooqataalerput

Partiip taassuma nunami tassani russit ikinnerussuteqartut amerlaqisut pilliutigalugit, inuiaat Letlandimiut pissaanermik annerusumik tunineqarnissaannik piumasaqaatertik, sakkukillisissimavaat.

Nazistit politiivi sakkutuuilu amerlanngitsut, illoqarfiit pingaarnersaanni Riga-mi upernaaq aqqusinikkut ingerlaaqatigiipput, matumani russinut ikinnerussuteqartunut amerlaqisunut akerliunertik ersersinniarsaraat, taamaaliornerallu partiimit inuiaassutsimik pingaartitsisumit National Alliancemit tapersersorneqarpoq. Partii taanna naalakkersuisoqatigiinni maanna ilaalerpoq.

Maannamut ministeriunerusoq Valdis Dombrovskis taassumalu partiia Centrumsparti, qanittukkut qinersinermi ajugaasuusoq, partiinik marlunnik suleqateqarluni naalakkersuisunngortitsivoq. Partiit taakku aappaat tassaalluni nunaatillit avatangiisinik pingaartitsisut aamma parti inuiaassutsimik pingaartitsisoq.

Ministeriuneq naalakkersuisunngortitsiniarnermini partiit annersaata tullianik russinik qinersisoqarnerusartumik isumaqatiginninniaraluarpoq, iluatsinngitsumilli.

Nuna ukiut 19-it matuma siornagut namminersortunngormalli, russit ikinnerussuteqarlutik innuttaasut amerlaqisut, russit nunamik aqutsisimanerannut akiniutitut tunulliunneqalerput.

Russit oqaasiisa atuarfinni atugaanerat 2004-mi killilersorneqalerpoq, 2006-imilu naalagaaffimmi innuttanngorsinnaanermut maleruagassat sukateriffigineqarlutik. Kikkut tamarmik Letlandimiusut oqalussinnaanissaat piumasaqaataalerpoq, oqalussinnaanerminnillu misilitsittalerlutik. Misilitsinnerni pingasoriarluni angusinngitsooraanni Letlandimi innuttanngortoqarsinnaanngilaq. Qinersisinnaanermik piiaaffiginnittoqassalluni EU-milu pas-itaartoqarsinnaassanani.

Talerperliuniat anguniakkaminnik sukatereqqammerput, taamaattorli anguniakkatik uninngatikkallarniarpaat, nunap aningaasarsiornera ingerlanerlioqisoq annaanniarlugu suleqataaniaramik.

Letland aningaasarsiornikkut nakkaattoornissaraluaminit, EU-mit aamma nunat siuarsagassat taarsigassarsiniartarfiannit 2008-mi annaanniarneqartariaqarsimavoq.

Suliffissaaleqisut maanna 22 procentiupput, nunani EU-mi ilaasortani amerlanerpaallutik, Dr ilanngutassiivoq.