Lethip soraarnera GA-p ajuusaarutigaa
- Henrik Leth ukiuni sisamani Sulisitsisut Peqatigiiffianni pisortaanerani suleqatigiittarnitsinni suliassaaleqisimanngeqaagut pissanganarsimaqaallu, Sulisitsisut Peqatigiiffianni siulersuisuni siulittaasup, Henrik Sørensenip, pisortap Henrik Lethip peqatigiiffimmi sulinera taama nalilerpaa.
Siulersuisuni siulittaasup oqaatigaa Henrik Leth, ukiuni sisamani pisortaanermini soqutiginartorpassuarnik angusaqarsimasoq. Isumaqarlunilu pisortap peqatigiiffik annertuumik pitsanngortissimagaa.
- Nukittorsaqatigiikkaangattami nammatassaqarsinnaanerulersarpugut, suliffeqarfiillu amerlanerit peqatigiiffitsinnut ilaasortanngortissinnaasarlutigit. Tassa Henrik Lethip ukiuni sisamani naammasisaasa anginerulersimanitsinnut tunuliaqutaalluarneri takuneqarsinnaalluarpoq, Henrik Sørensen oqarpoq.
Henrik Lethip taartissaata Henrik Lethip suliarisimasai attassinnaasariaqarpai, suliassallu nammassinnaasariaqarlugit, siulersuisuni siulittaasoq Henrik Sørensen taama oqarpoq.
- GA´p siumut takorluuerpalaartumik ingerlatsiniarnera suleriaasiatalu ingerlanneqaqqinnissaanut inuk tulluuttoq nassaarisariaqassavarput, Henrik Sørensen oqarpoq.
Siunissarmita Sulisitsisut peqatigiiffiannut qanoq isikkoqarpa?
- Suliffik pissanganaqaaq unammillernartuullunilu. Uagulli tassani inissaqarsoraagut isummersueqataanissatsinnullu pisussaaffeqarsoraluta, ukiummi kingulliit sisamat taamaattoqareerpoq, ilami ukiuni 40-ni kingullerni taamaattuarsimasugut oqaatigineqarsinnaavoq, Henrik Sørensen nassuiaavoq.
Illuatungeriit akissarsiat pillugit oqaaseqarusunngillat, kisiannili erseqqissarneqarpoq Henrik Leth soraarniuteqarnermini immikkut akissarsitinneqassanngitsoq. Henrik Leth maaji aallarnerfigalugu, Polar Seafoodimi siulersuisuni siulittaasunngussaaq.
