Leona Aglukkaq Issittumi siunnersuisooqatigiinni siulittaasunngussaaq
Canadap premierministeria Stephen Harper Nunavummi ukiumoortumik angalaartilluni Eqaluttuutsiani - tuluttoorlugu Cambridge Bay-imi Leona Aglukkap Issittumi Siunnersuisoqatigiinni siulittaasunngornissaa nalunaarutigaa.
Leona Aglukkaq Canadami politikerit akornanni ataqqisaalluartuummat taassuma siulittaasunngornissaanik nalunaarut nuannaarutigineqaqaaq. Taanna Inuuvimmiuuvoq, 45-nik ukiulik, Canadamilu peqqinnissamut ministeriunermi saniatigut Canadap avannaani aningaasarsiornerup inerisarneqarnissaanut ministeriullunittaaq.
Aamma Nunavut sinnerlugu Canadami inatsisartuni ilaasortaavoq, naggueqatitsinnilu siullersaalluni Canadap ministeriisa ataatsimiititaliaanni ilaasortaavoq, Issittumilu Siunnersuisoqatigiinni sulineq misilittagaqarfigereerpaa.
Siornami Issittumi siunnersuisoqatigiit Nuummi ataatsimeersuarmata Canadamiut aallartitaanni siulittaasuuvoq.
Canadamiut ukiuni tulliuttuni siulittaasuunissaat pingaaruteqaqaaq, tassami nunat allat Issittumi Siunnersuisoqatigiinni alapernaattutut ilaasortanngorsinnaanersut isummerfigineqartussaavoq. Tamatumani EU aamma Kina eqqarsaatigineqarput.
Issittumi Siunnersuisoqatigiinni nunat ilaasortat tamakkiisumik taasisinnaatitaasut arfineq pingasut saniatigut alapernaattutut ilaasortaatitat arlaqarput. Nunat inoqqaavisa kattuffii arfinillit alapernaattutut ilaasortaapput tassanilu ICC akuuvoq.
Issittumi Siunnersuisooqatigiit pingaaruteqaleriartuinnarnerisa kingunerisaanik nunat allat ilaasortanngorusuttut amerliartuinnarput. Issittumimi pisuussutit piiarneqarsinnaaneri inerisaaffigineqaleruttorput, silallu pissusaata allangoriartornerata kinguneranik Issittumi avatagiisit illersorneqarnissaat pisariaqartinneqalersimalluni.
