Leona Aglukark Canadami tamarmi peqqissutsimut ministerinngorpoq
Tamanna sioqqullugu Nunavummi peqqinnissaqarneq akisussaaffigaa.
Canadallu naalagaaffiani qinersisoqalermat konservativet sinnerlugit qinigassanngortippoq 35 procentingajammillu qinigaanermigut tupaallatitsingaatsiaqaluni ullumi peqqissutsimut Canadami naalakkersuisunngorpoq.
- Leona inuusuttuuvoq Juliane Henningsenikkutut ittunut assersuunneqarsinnaasoq, Aqqaluk Lynge oqarpoq, nangipporlu…
- Canadap naalagaaffiani aatsaat siullerpaamik naggueqatitsinneersumik taamatut ministeritut inissittoqarpoq, Aqqaluk Lynge oqarpoq.
Taanna nunatsinnut sanilliussilluni oqarpoq tamanna taamani 1971-imi Knud Hertlingip Danmarkimi nunarput pillugu ministerinngortitaaneranut assingusoq.
- Taamani 1971-imi nuannaallaratta puigunaaqisoq, akitsinniittut massakkut tamanna misigivaat, oqarpoq, nangipporlu:
- Leonap suliassarilerpaa issittormioqatigut aammalu naggueqatigut aammalumi Indianerit peqqinnissakkut isumagineqarnerisa annertunerujussuarmik sammineqalernissaa ilimagineqarsinnaavoq, oqarpoq.
Taanna erseqqissaavoq Leona talerperliugaluartoq taamaattoq isumaqarluni taama inissinnera sutigut tamatigut naggueqatitta ingerlanneqarnerannut iluaqutaajumaartoq.
Aperaarpullu Akilinermi Inuit akornanni peqqissuseq pitsaanerpaajunngitsoq tusartaannaripput, tamannalu naggueqatigiit Inuit peqqissusaannut taassuma taama Canadami tamarmi naalakkersuisunngornera Inunnut siunissami qanoq kinguneqassasorineraa.
- Leona piumasaqarfigineqartorujussuussaaq taavanimi aamma uagutsitulli napparsimaveqarfinni sulisussaaleqinikkut ajornartorsiuteqarput, nunarsuummi sinnerani nunani issittuni aamma taamaappoq. Taamaattumik ilimanarluinnaqqissaarpoq Leona Aglukarkimut politikkikkut naammassisaqarnissamullu piumasaasut annertussaqisut, taamaattumik ICC-miit uagut tamanna nuannaarutigaarput pilluaqqullugulu, taama oqarpoq Inuit Issittormiut Siunnersuisoqatigiiffianni tassa ICC Greenlandimi presedenti Aqqaluk Lynge oqarpoq.
