Leo Rosing attaviitsunngorallarpoq
Aasianni Inuit Ataqatigiit siulittaasuat kommunalbestyrelsemullu iseqqittoq Leo Rosing ippassaq unnukkut partiimit tunuarallarluni nalunaaruteqarpoq, kommunalbestyrelsemi suleqatigiinneq toqqissisimanngissutigalugu.
Inuit Ataqatigiinnik 1978-imi pilersitseqataasoq Leo Rosing ippassaq aalajangerpoq, partiiminit tunuarallarniarluni, nammineq oqarnermisut kommunalbestyrelsemut ilaasortanngortut akornanni oqartussaaffinnik agguaasarnerup allanngortinneqarnera pissutigalugu.
Leo Rosing nassuiaavoq, inuit qassinik taaguunneqarsimanerat apeqqutaatinnagu inissitsitertarsimagaluarlutik, maannali qassinik taaguunneqarsimaneq apeqqutaatinneqartalersimammat tunuarallarnerminut pissutaaqataasoq.
- Aasianni Inuit Ataqatigiit piumasaqaataat tamarmik peerneqarput, misigisimavunga demokratii malinnagu bureaukratiili atorlugu inissitsitertoqartoq. Aamma tamanna qinersisoqanngikkallarmalli oqaloqatigiissutigisimagaluarparput, isumaqarpungalu pissutsit toqqissisimananngitsut ajoraluartumik ingerlaannartut. Kommunalbestyrelsemi toqqissisimasumik isersimarusuppunga. Isumaqarpunga massakkut saqqummernialernerput patajaanngitsoq. Leo Rosing nassuiaavoq.
Aasianni Inuit Ataqatigiit sinnerlugit inuit arfineq-marluk kommunalbestyrelsemut ilaasortanngorput, amerlanerussuteqalerlutik, taamaalillutillu taaguunneqarnerpaaq Ane Hansen borgmesterissatut inassutigalugu. Leo Rosing oqarpoq, Ane Hansenip borgmesterissatut inassutigineqarneranut isumaqataavallaarsimanani, imminulli piukkunnani alla piukkunnerusimagaluarlugu.
Pissutsinik allanngortoqanngippat Leo Rosingip attaviitsutut ingerlagallarnissani naatsorsuutigaa.
- Apeqqutaavoq qanoq pisoqaqqissanersoq. Uannut artornaraluaqaaq, kisianni neriuppunga paasiumaaraannga. Erseqqissaavoq.
Aasianni Inuit Ataqatigiit siulittaasorigallagaat Otto Sandgreen oqaaseqartinniaraluaratsigu iluatsinngilarput. Borgmesteritut inassutigineqartoq Ane Hansen oqarpoq, siulersuisut ataatsimeereertinnagit annerusumik oqaaseqarsinnaanngikkallarluni, Leo Rosingimullu tunngatillugu tupaallassimanerarpoq erseqqissumillu nassuiaateqartariaqaraluarnerarlugu.
