Lennonip toqutsisuata iperagaanissaa uillarnerata akerleraa

Nipilersortartuni nuannarineqaqisuni, The Beatlesikkunni, nipilersoqataallunilu erinarsoqataasarsimasup, John Lennonip, toqutsisuata parnaarussivimmit iperagaanissaa, uillarnerata, Yoko Ono-p, piumanngilluinnarpaa.
juulip 28-at 2010 08:32

John Lennonimik ukiut 30-t matuma siorna toqutsisup, Mark David Chapmanip, misiligummik iperagaanissaanut Yoko Ono akerliuvoq.

Aviisimi Politikenimi tamanna allaaserineqarpoq.

Mark David Chapman ukiuni 29-ni parnaarussaareerpoq, misiligummillu iperagaassanersoq ataatsimiititaliap aggustimi aalajangertussaavaa. Taamaattumik John Lennonip uillarnera ataatsimiititaliamut allappoq, akerliunini takutinniarlugu.

John Lennon nuliilu Yoko Ono immiussisarfiutiminni immiussereerlutik decembarimi 1980-imi angerlartillugit Mark David Chapmanip John Lennon New Yorkimi angerlarsimaffiata silataani toquppaa.

Chapmann ukiut 20-t inuuninilu naallugu taamani parnaarussaasussanngortinneqarpoq.