Lene Espersen saqqummiussivoq
Inatsisinik atortitsinermut Danmarkimi ministeri, Lene Espersen, Kalaallit Nunaanni eqqartuussiveqarneq pillugu inatsissamut siunnersuummik maannakkorpiaq saqqummiussivoq. Kalaallit Nunaanni oqaluttuarisaanermut tamanna pingaarutilerujussuuvoq.
Eqqartuussiveqarneq pillugu ataatsimiititaliarsuup ukiuni 14-ini suliai taamaalillutik naammassingajalerput. Inatsisissamut siunnersuut partiinit tamanit nersualaarneqarpoq.
Inatsisissamut siunnersuut sisamanik immikkoortortaqarpoq. Inatsit naapertorlugu eqqartuussinerit tamarmik kalaallisut ingerlanneqartassasut piumasarineqassaaq, ullumikkullu eqqartuussisuusut inatsisitigut ilisimasaat pitsanngorsarneqassapput. Kalaallit Danmarkimi Herstedvesterimi parnaarussivimmiittut, ukiuni kingullerni oqallisaaqisut, nunatsinnut aamma angerlartinneqassapput.