Lene Espersen nalunaarusiortussanngorpoq

Nunanut allanut ministeri, Lene Espersen, nunanut allanut ministerit Canadami marsip naalernerani nunat issittut pillugit ataatsimiinnissaannut taarsiullugu Mallorcami poorskimi sulinngiffeqarnini pillugu ullumi suli ataasiarluni qanimut oqaloqatigineqarpoq.

Qanimut oqaloqatiginninneq tamatumuuna Folketingip nunanut allanut politikkeqarnermut ataatsimiititaliaani pivoq, tamatumani nunanut allanut ministeri nalunaarusiortussanngortitaalluni, inatsisinik atortitsinermut ministerip, Lars Barfoedip, Canadami nammineq taarserluni ataatsimeeqataasimanera apeqqutaatinnagu.

- Isornartorsiuineq Folketingip ataatsimiittarfiani saqqummiunneqareersimasoq itisilernerullugu sammivarput, tassa nunat issittut pillugit ataatsimiinneq pingaaruteqartoq, taama oqarpoq Socialdemokratini nunanut allanut tunngasunut oqaaseqartartoq, ataatsimiititaliamilu ilaasortaq, Mogens Lykketoft.

Danmarkip Savalimmiunik Kalaallit Nunaannillu naalagaaffeqateqarnermini nunallu taakkua marluk nunani issittuni soqutigisaannut immikkut akisussaaffeqarnera taassuma tikkuarpaa. Soqutigisat, ullumikkut ukiorpaalunnguit matuma siornatigorninngarnit pingaaruteqarnerusut, ilaatigut pissutigalugu silap pissusaata allanngoriartornerata nunat issittut Qalasersuup eqqaani pisuussutinut pisinnaatitaanerminnik ilungersornerat annertusisimammagu.

- Tassami nunat issittut pillugit apeqqutit tassaaginnanngillat, inatsiseqarneq nunavissuullu immap naqqatigut imminnut atanerisa agguataarnissaat pinngortitamilu pisuussutit, tamatumani aammattaaq sillimaniarnissamut politikkeqarnissaq apeqqutaavoq annertoorujussuaq, taamaattumillu ataatsimiinneq taamatut ittoq peqataaffigineqartariaqarluni, tassalu soorunami nunanut allanut ministerip aallartinneratigut, pingaartumik naalagaaffiit angisoorsuit taamaaliorsimappata, Mogens Lykketoft naggasiivoq.