Lene Espersen araberinut utoqqatsersimannginneragaavoq
Aviisit qulequtaat nunanut allanut ministeeriaqarfimmi ulapisitsisimapput.
Lene Espersenip utoqqatsersimasutut oqarsimanerarneqarnini ilumuunnginnerarpaa. Titartakkat musliminik taama amerlatigisunik mamiatsatsitsisimanerat ajusaarutigineraannarsimavaa. Allatut oqarsimanani Lene Espersenip oqaatigaa.
- Paasiuminartumik oqaaseqarpunga. Arlaannullu utoqqatsersimanerarneqarnera ilumuunngilluinnartoq oqaatigisinnaallugu. Eqqumiigeqaaralu tamakku ullumi oqaatigisaqattaareerlugit, ippassaq Egyptinimiut tusagassiortuinut sianerpugut, suli oqaatsikka utertuassagikka oqaatigalugu.
Egyptenimi palasiunerup oqaaseqartartua ullumi DRimut oqarpoq Lene Espersen utoqqatsersimanngitsoq, ajuusaaginnarsimasorli.
Utoqqatsertoqarsimanerata utoqqatsertoqarsimannginnerataluunniit uiverutigineqarnera Danmarkip Arabiamiullu akornanni nutaamik aaqqiagiinnginnermik kinguneqarnissaa ilimagineqanngilaq. DRip kangia qiterlermit ilanngutassiortua taama naliliivoq.
- Massakkorpiaq eqqartorneqarunnaareerpoq, inuiaqatigiinni inuunermut akornusiinngilaq aamma Danmarkip Egyptenillu akornanni nunallu arabiamiut muslimiusut akornannut akornusiinani.
Nunanut allanut ministeeriaqarfiup maannakkut tamaviaarluni Arabiamiut tusagassiorfii Lene Espersenip utoqqatsersimannginneranik erseqqissaassuteqartinniarsaraat. Danmarkip Radioa taama tusagassiivoq.
