Lene E. sakkortuumik uparuarneqarpoq
Danmarkimi nunanut allanut ministeri Lene Espersen, napparsimmaviit namminersortut sinnilimmik akilerneqartarnerat pillugu erseqqissumik Folketingimut paasissutissiisarsimannginera pillugu aningaasaqarnermut ataatsimiititaliamit uparuarneqarpoq.
Allattoq Jaaku Lyberth
novembarip 04-at 2010 11:50
Aningaasaqarnermut ataatsimiititaliaq isumaqatigiilluni uparuaavoq. Sakkortuumik isornartorsiuisoqarpoq.
- Ministerit eqqortumik akissuteqartarnissaat nakkutiginerulerniarparput, aningaasaqarnermut ataatsimiititaliap siulittaasua Kristian Thulesen Dahl Dansk Folkepartiineersoq oqarpoq.
Lene Espersenip uparuarneqarneratigut pineqartup tassunga killeqartoq Thulesen Dahl isumaqarpoq.
Uparuaaneq Socialdemokraatit akueraat, Lene Espersenillu ataatsimiititaliamit isornartorsiorneqarnera iluarisimaarlugu.
- Ataatsimiititaliaq isumaqatigiilluni taamatut oqaaseqarnera siornatigut naammattoorsimanngilara, Folketingimi uparuaanerit sakkortunerpaartaraat, Socialdemokraatit aningaasaqarneq pillugu oqaaseqartittagaq Morten Bødskov oqarpoq.
