Lene E: Piumasaqaat nutaajunngilaq

Issittumi ineriartornermut periusissaq nutaaq Kalaallit Nunaannit, Danmarkimit Savalimmiunillu ataatsimoorullugu suliarineqartoq Danmarkimi nunanut allanut ministerip Lene Espersenip suli oqaaseqarfigerusunngikkallarpaa. Kisianni Danmarkip Kalaallillu Nunaata Qalasersuarmik piginnittussaatitaanermik piumasaqaateqarnissaat nutaajunngitsoq erseqqissaatigaa.
Allattoq Louise M. Kleemann
maajip 17-at 2011 12:47

- Periusissatut pilersaarut suli naammassineqanngilaq aamma folketingimi partiit akornanni oqallisigineqaqqaartussaavoq, taamaattumik suli oqaaseqarfigisinnaanngikkallarpara, Lene Espersen oqarpoq.

Kisianni Qalasersuup pilerngunneqarneranut atatillugu, tamanna Danmarkip Nunattalu naalakkersuinikkut ataatsimoorussamik susassaqarfigigaat, piumasaqaammi naqissuserneqassasoq Lene Espersenip oqaatigaa.

- Danmarkip tungaaniit taamatut piumasaqaateqartoqarnermik oqariartuut nutaajunngilaq. Nunat tamat akornanni pissutsit malinnaaffigeqqissaarneqarput, aamma  piginnittussaatitaanermut atatillugu uppernarsaataasinnaasut danskit tungaanniit tunniunneqassapput, soorluttaaq issittumi nunat allat aamma taamatut iliortut. kisianni Qalasersuaq kisimi immini siunertaanngilaq, Lene Espersen oqarpoq.

Ruslandi Qalasersuarmik piginnittussaatitaanermik piumasaqaateqareerpoq. Canadap tungaaniit piumasaqateqartoqarnissaa aamma naatsorsuutigineqarpoq.

Qalasersuamik piumasaqaatit nunat akornanni isumaqatiginninniarnikkut naammassineqassasut Danskit nunanut allanut ministeriaqarfiannit oqaatigineqarpoq.

Danmarkimit aamma Kalaallit Nunaannit piginnittussaatitaanermik piumasaqaat kingusinnerpaamik 2014-imi tunniunneqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq