Lene E partiimi siulittaasutut tunuarpoq
Partiimi ilaasortat piffissami kingullermi politikkilerinatik oqalualuinnarsimapput, Lene Espersen oqarpoq.
- Minnerunngitsumik ulluni kingullerni konservatiivit partiianni sakkortuumik isummersortoqaqataarnera sammineqarsimavoq. Taamaammat partiip siulittaasuatut tunuarniarlunga aalajangerpunga. Taamatut aalajangernera konservatiivit partiiata ajoqusinnginnissaanik peqquteqarpoq. Kikkulluunniit partiimit pingaarnerutinneqarsinnaanngitsut isumaqartuaannarsimavunga. Uangalu politikkikkut sulininni ineriartorsimaninnut konservatiivit partiiat qutsavigisariaqarpara.
Lene Espersenip ilanngullugu oqaatigaa, Nunanut allanut ministeritut ingerlaannarniarluni. DR-imi tusagassiortut politikkikut aaqqisuisuat, Ask Rostrup tusagassiuutinik katersuititsinermut peqataavoq.
Tusagassiortunik katersuutsitsinermi Lene Espersen nersualaartariaqarpoq - aalaakkaasumik isummersimanini eqqissilluni saqqummiuppaa, nammineq inuttut tunulliunnini takutillugu, taamalu pingaaruteqartigisumik aalajangeraanni taamatut pissuteqarnissaq apeqqutaasorujussuuvoq. Politikeritut allatut aamma Lene Espersenip oqaluttuarisaanermi qanoq eqqaaneqartarnissani sianigisorujussuuaa - tassa annikinnerusumik akileraartarnermut atatillugu, suliffeqanngitsut ullormusiaannut atatillugu minnerunngitsumillu sulisinnaajunnaarsiuteqarnermut atatillugu aaqqissuusseqqinnissamut atatillugu angusani eqqartorpai. Namminerlu aamma Kangiani Qiterlermiitilluni pissaaneqarniunneq ingerlanneqarsimasoq kusanaaginerarlugu oqarluni.
Konservatiivit folketingimi ilaasortaatitaat aqagu ullaap tungaani partiip siulittaasussaanik nutaamik toqqaaniassallutik ataatsimiissapput. Siulittaasussatut piukkussat marluupput, tassaallutik inatsiseqarnermut ministeri Lars Barfoed aamma inuussutissarsiornermut aningaasaqarnermullu ministeri Brian Mikkelsen.
Arktisk Rådip Canadami siorna februaarimi ataatsimiinnerani, USA-p nunanut allanut ministeriata Hillary Clintonip peqataaffigisaani, Lene Espersenip peqataanngitsoornerata kingorna sakkortuumik isornartorsiorneqarnera aallartippoq.
Sakkortuumik isornartorsiuinerup kingorna, isumasiuinerit naapertorlugit 2001-imi qinersinermut sanilliullugu qinersisartut partiimik tapersersuisut affaannanngorsimammata partiip ajornartorsiortorujussuanngornera, ullumi tusagassuiuutinik katersuutsitsinermi Lene Espersenip isertuutinngilaa.
