Lene E. isornartorsiutinut akivoq
Danmarkimi folketingip marsip 18-ianni isumaqatigiillutik Libyamut timmisartunik malersuutinik aallartitsiniarlutik aalajangiummassuk, Savalimmiuni Nunatsinnilu naalakkersuisut siulittaasuisa, tamanna tusagassiuutini atuartariaqarsimavat. Nunanut allanut ministereqarfiup Kalaallit Nunaata Savalimmiullu naalakkersuisuisa siulittaasuisa aalajangiineq pillugu ilisimatinnissaat pissutissaqarsorisimanngilaa.
Akuersaarnanngilluinnarpoq, Dansk Folkepartiip kalaallit nunaat pillugu oqaaseqartartua, Søren Espersen narrutsassimaarluni oqarpoq, siunissamilu tamanna qanoq iluarsiiviginiarneqarnersoq pillugu ministeriunermut arlalinnik apeqquteqarluni.
Akissutaali naamiuvoq.
Pissutsit ullumikkut atuuttut allanngortinneqassanngitsut, nunanut allanut ministereqarfimmiit ilisimatitsissutigineqarpoq. Suliamut atatillugu KNR Nunanut allanut ministereqarfimmut arlalinnik apeqquteqarsimavoq, ullumikkut qarasaasiakkut akineqartunik.
- Nunanut allanut Sillimaniarnikkullu apeqqutinut tunngassutilinnik, naalagaafeqatigiinnut taakkununnga sunniuteqartussamik immikkut aalajangiisoqassatillugu, Kalaallit Nunaat Savalimmiullu ataatsimut isigalugit suleqatigineqarluartut isumaqarpunga, Lene Espersen allappoq.
Pissutsit ullumikkutut itsillugit, Folketingip nunanut allanut tunngasunut ataatsimiittartui ilisimatissallugit, Danmarkimi naalakkersuisut pisussaaffeqarput, tassanilu aamma kalaallit savalimmiormiullu folketingemut ilaasortaatitaat ilaasortaapput. Aalajangigassat aatsaat "kalaallit nunaannut savalimmiunullu sunniuteqassangatinneqarpata" taakku naalakkersuisuisa siulittaasui Danmarkimit sianerfigineqassapput. Suliamiit suliamut naliliisoqartarpoq, Libyamilu sorsuunneq eqqarsaatigalugu taamaassimanngilaq, ministeri allappoq.
Taassuma siornatigut sianersimannginnini piffissaaleqinermik pissuteqarnerarsimavaa.
Kuupik Kleistip sianerfigineqarsimannginni Sermitsiamut uppernarsarpaa.
- Nalinginnaasumik suliani erloqinartuni soorlu taamaattoqartillugu ileqquusaraluartoq uani pineqartumi Danmarkimi naalakkersuisuniit attavigineqarsimanngilagut. Kisianni tassa taamaakkaluartoq, innuttaasunik toqoraanerit pingitsoortinniartussaavagut, taanna oqarpoq.
